BAHALA NA SI BATMAN

Bandera (May 4, 2012)

BANTAY-SABONG ni Rolando S. Luzong

BAHALA NA SI BATMAN

         Kadalasan na kapag ang isang manok-panabong ay natalo, maraming mga sisihan at kantyawan. Ilan sa mga dahilan kapag natalo ang isang manok na inilabana, lalo na ‘yung maraming samang-parada ay ang mga sumsunod :

1)    Ang laki daw kasi ng nakalaban.

2)    Masuwerte daw kasi sa araw na ‘yun  ang kulay ng nakalaban.

3)    Malas daw sa araw na ‘yun ang kulay ng natalong manok.

4)    Maganda daw ang senyales ng kalaban.

5)    Di daw marunong ang nagtare at wala sa sipat ang tare.

6)    Mali daw ang bitaw ng sultador kasi masyadong malayo. Eh, kung malapit naman, mali din ‘yun ‘pag natalo kasi masyadong malapit.

7)    May buwisit daw na kasama kasi hindi pa napapalaban ang manok eh nanghihingi na ng balato o kaya ay talunan.

8)    Malas daw ang kulay ng suot na damit; me nadaanan daw kasing libing; inaway daw kasi ng asawa bago umalis papuntang sabungan at maraming pang iba.

Napakaraming excuse talaga kapag ang manok ay natalo, kasi minsan, iniaasa na lamang sa swerte. Madalas nga ay hindi ang manok ang kinukundisyon kundi ang bulsa. Kapag nakatihan na maglaban komo may pamusta kahit pa hindi naman naikondisyon ang manok ng maayos, sige na. Bahala na si Batman…ika nga.

Andiyan naman iniaasa sa posisyon ng buwan, Kapag kabilugan daw ng buwan ay buwenas ang mga puti o yung may light color feathers at kung tagdilim naman daw ay yung mga alimbuyugin o mga dark colored naman.

Ang daming pinagbabasehan at swerte o agimat o senyales na inaasahan. Sabi nag ng isang beteranong sabungero, “Malapit ang buwenas sa magaling at kundisyon na manok”.

                                    PAGSUBO NG MANOK, DI DAPAT

Natural sa sabong na gawin nang isang lumalaban ang lahat ng paraan upang makalamang komo nga hindi lang manok ang pinaglalaban kundi ang pusta lalo pa kung malaki.

Sa aktuwal na pagbibitaw ng manok, may ilan diyan na may masamang ugali na isinusubo ang kanilang tinale. Sa ganitong gawi ay nasisira ang diskarte nang
kalabang soltador na minsan ay dahil sa pagkagulat ay nahuhuli sa pagbitaw ng manok niya. Madalas na nananalo ang isinusubong manok dahil bago makaporma ang kalaban ay naka-angat na ang isinubong manok.

Ang hindi maganda sa ganitong istayl ay hindi lamang ‘yung dahil sa nalalamangan ang kalaban kundi ang katotohanan na napakadelikado rin ito dahil
marami nang beses na ang hindi pa nabibitawan manok ay nililipad ng isinubong manok sa kamay mismo ng kalabang soltador. Dahil dito , ilang beses na rin na may mga taong nasaktan, nasugatan o namatay pa nga.

Bagama’t may mga sabungan na sa ngayon ang may mga regulasyon at parusa o penalty laban sa mga nagsusbo ng manok, dapat siguro na mas matindi pang
kaparusahan ang igawad sa mga violators tulad halimbawa ng pag-sususpinde sa kanya na makapasok sa sabungan o kaya at total ban.

Dapat na rin na lahat ng sabungan ay mahigpit na ipatupad ang ganitong regulasyon.

Dapat din na mas iatras pa o paglayuin ang guhit sa gitna ng ruweda kung saan hindi maaring lumampas ang manok bibitawan.

Gawin natin ito for the spirit of fair play o parehas na laban at upang maproteksiyonan ang bawat isa sa loob ng ruweda.

MALIGAYANG KAARAWAN sa aking kapatid na si Jun (Ramon Jr.) kahapon at congratulations sa magkakampiyon sa grand finals ng 2012 Bullang-bullang 8-Bullstag Derby na naglalaban pa habang sinusulat an kolum na ito..